Претпладневното сонце вчера за кратко ги израдува жителите на крајбрежните населби на Охридско Езеро, но дождот што следуваше веднаш потоа уште повеќе ги зголеми нивните стравови. Водостојот порасна за уште еден сантиметар и езерото продолжи да се шири на сите страни. Нема плажи на источниот брег, од Лагадин до Свети Наум, охридското шеталиште е речиси рамно со водата, во Струга има поплави насекаде, а во Албанија некои кафеанџии ќаруваат на сметка на нивните поплавени конкуренти. Еве како изгледа еден круг околу езерото, кое речиси никој не го видел толку големо.

Само дел од кејот во Охрид е заграден со вреќи со песок. И тие ги крадат и ги разнесуваат. Пристаништето е речиси до самата горна граница на водата. Паниката во градот расте од ден на ден. Насекаде се зборува само за езерото и за тоа уште колку може да се издржи.

На патот кон Струга нé пречекуваат поплавени ниви, слични на кочанското поле, кога се полеваат оризовите посеви. Такво е целото поле, од Охрид до Црн Дрим. Струшките улици и дворови пливаат под вода. Многу места се тешкопроодни поради длабоките вирови, а заштита има само на кејот, иако и неговиот долен дел е сосема неупотреблив. Сепак, Струга е единственото место на целото крајбрежје што сé уште има плажи, во овој период покриени со снег.

Езерскиот хумор доби нова димензија